കുറവിലങ്ങാട് കാർ ലോറിയിലിടിച്ച് ഒരു കുടുംബത്തിലെ അഞ്ച് പേർ മരിച്ചു

കോട്ടയം> എം സി റോഡില് കുറവിലങ്ങാട് കാളികാവിന് സമീപം തടിലോറിയും കാറും കൂട്ടിയിടിച്ച് ഒരു കുടുംബത്തിലെ അഞ്ചുപേര് മരിച്ചു. ലോട്ടറി കച്ചവടക്കാരനായ കോട്ടയം വേളൂര് ആല്ത്തറവീട്ടില് തമ്പി (70), ഭാര്യ വത്സല, മരുമകള് പ്രഭ, മകന് വേളൂര് ഉള്ളത്തില്പ്പടിയില് അര്ജുന് പ്രവീണ്(19), പ്രഭയുടെ അമ്മ ഉഷ എന്നിവരാണ് മരിച്ചത്.

വെള്ളിയാഴ്ച രാത്രി 12-നാണ് അപകടം. കോട്ടയം ഭാഗത്തുനിന്ന് പെരുമ്പാവൂരിലേക്ക് തടിയുമായി പോയ ലോറിയില് കുറവിലങ്ങാട് ഭാഗത്തുനിന്ന് ഏറ്റുമാനൂരിലേക്ക് വന്ന കാര് ഇടിക്കുകയായിരുന്നു. ഇടിയുടെ ആഘാതത്തില് ലോറിയുടെ അടിയിലേയ്ക്കു കയറിയ കാറിനുള്ളില് യാത്രക്കാരായ അഞ്ചു പേരും കുടുങ്ങി. ഓടിക്കൂടിയ നാട്ടുകാര് ചേര്ന്ന് രക്ഷാപ്രവര്ത്തനം നടത്താന് ശ്രമിച്ചെങ്കിലും ആദ്യം ആരെയും പുറത്തെടുക്കാനായില്ല.

തുടര്ന്ന് കടുത്തുരുത്തിയില് നിന്ന് അഗ്നിരക്ഷാ സേനാംഗങ്ങള് എത്തി കാര് വെട്ടിപ്പൊളിച്ചാണ് ഇവരെ പുറത്തെടുത്തത്. ഉടനെ ആംബുലന്സില് മെഡിക്കല് കോളേജില് എത്തിച്ചു. അവിടെവെച്ച് അഞ്ചുപേരുടെയും മരണം സ്ഥിരീകരിച്ചു. മൃതദേഹങ്ങള് ആശുപത്രി മോര്ച്ചറിയില്. അപകടത്തെ തുടര്ന്ന് അരമണിക്കൂറിലേറെ എം.സി.റോഡില് ഗതാഗതം സ്തംഭിച്ചു. കുറവിലങ്ങാട് പൊലീസ് സ്ഥലത്തെത്തി മേല്നടപടികള് സ്വീകരിച്ചു.

from Kerala || Deshabhimani ​Online ​News https://ift.tt/37XQm97
via IFTTT