കെട്ടിടനിർമാണ പെർമിറ്റും ഇനി സ്വന്തംനിലയിൽ

തിരുവനന്തപുരം
ഇനി കെട്ടിടനിർമാണ പെർമിറ്റ് ഉടമയുടെ സ്വയം സാക്ഷ്യപ്പെടുത്തലിലൂടെ ലഭ്യമാകും. ഉടമയെ വിശ്വാസത്തിലെടുത്ത് കെട്ടിട നിർമാണാനുമതി നൽകുന്ന നടപടികൾക്കാണ് സർക്കാർ തുടക്കമിടുന്നത്. ലോ റിസ്ക് ഗണത്തിലുള്ള 300 ചതുരശ്ര മീറ്റർവരെ വിസ്തൃതിയുള്ള ഗാർഹിക കെട്ടിടങ്ങൾ, 100 ചതുരശ്ര മീറ്റർവരെ വിസ്തൃതിയുള്ള വാണിജ്യ കെട്ടിടങ്ങൾ, 200 ചതുരശ്ര മീറ്റർവരെ വിസ്തൃതിയുള്ള വിദ്യാഭ്യാസ സ്ഥാപനങ്ങൾ, ഹോസ്റ്റലുകൾ, മതപരമായ കെട്ടിടങ്ങൾ, വൃദ്ധസദനങ്ങൾ എന്നിവയ്ക്കാണ് സ്വയം സാക്ഷ്യപ്പെടുത്തലിന്റെ അടിസ്ഥാനത്തിൽ നിർമാണ പെർമിറ്റ് നൽകുക. കെട്ടിടത്തിന്റെ അടിസ്ഥാനം പൂർത്തിയായാൽ സ്ഥലപരിശോധന നടത്തും. ചട്ടലംഘനമുണ്ടെങ്കിൽ തുടക്കത്തിൽ കണ്ടെത്താനും ഇതുവഴി സാധിക്കും.

തദ്ദേശഭരണ സ്ഥാപനത്തിൽ നിശ്ചിത ഫോമിൽ പ്ലാനുകൾ ഉൾപ്പെടെ എം പാനൽഡ് ലൈസൻസികളാണ് പെർമിറ്റിന് അപേക്ഷിക്കേണ്ടത്. നഗരകാര്യ വകുപ്പിൽ ഫീസ് അടച്ച് എംപാനൽ ചെയ്ത രജിസ്റ്റേർഡ് ലൈസൻസികൾ ആയിരിക്കണം ഇത്. അപേക്ഷ ലഭിച്ചെന്ന് തദ്ദേശഭരണ സെക്രട്ടറി സാക്ഷ്യപ്പെടുത്തുന്നതോടെ പെർമിറ്റ് ലഭിച്ചതായി കണക്കാക്കും. അഞ്ചു ദിവസത്തിനുള്ളിൽ ഈ നടപടി പൂർത്തിയാക്കണം. അപേക്ഷയിൽ രേഖപ്പെടുത്തിയ തീയതിയിൽ നിർമാണം ആരംഭിക്കാം. അപേക്ഷ കെട്ടിടനിർമാണ ചട്ടങ്ങൾക്കും ബാധകമായ മറ്റു ചട്ടങ്ങൾക്കും വിധേയമായിരിക്കണം. നിരാക്ഷേപപത്രം (എൻഒസി) ലഭ്യമാക്കേണ്ടതുണ്ടെങ്കിൽ അതുകൂടി ഉൾപ്പെടുത്തിയാണ് അപേക്ഷ സമർപ്പിക്കേണ്ടത്. പെർമിറ്റ് ലഭിക്കാൻ നിലവിലുള്ള വിവിധ പരിശോധനയും നടപടിക്രമങ്ങളും ഇതിലൂടെ ഒഴിവാകും. ഒരുവർഷം ഏകദേശം, നഗരസഭകളിൽ 80,000വും പഞ്ചായത്തുകളിൽ 1,65,000 കെട്ടിടനിർമാണ അപേക്ഷകളും കൈകാര്യം ചെയ്യുന്നുണ്ട്. ഇതിൽ രണ്ടുലക്ഷത്തോളം അപേക്ഷയിലെങ്കിലും ഇത്തരത്തിൽ പെർമിറ്റ് നൽകാൻ കഴിയുമെന്നാണ് സർക്കാരിന്റെ വിലയിരുത്തൽ.

from Kerala || Deshabhimani ​Online ​News https://ift.tt/2TqPwzk
via IFTTT