മുന്‍ഗണനാപദ്ധതികള്‍ക്ക്‌ വേഗം കൂട്ടണം , സമയബന്ധിതമായി പൂർത്തിയാക്കണം : മുഖ്യമന്ത്രി

തിരുവനന്തപുരം
കോവിഡ് സാഹചര്യത്തിൽ സർക്കാരിന്റെ മുൻഗണനാപദ്ധതികൾക്കുണ്ടായ വേഗക്കുറവ് മറികടന്ന് സമയബന്ധിതമായി പൂർത്തിയാക്കണമെന്ന് മുഖ്യമന്ത്രി പിണറായി വിജയൻ നിർദേശിച്ചു. ഭൂമി ഏറ്റെടുക്കേണ്ടിടത്തെല്ലാം പുനരധിവാസത്തിന് മുഖ്യപരിഗണന നൽകണമെന്നും മുൻഗണനാപദ്ധതികളുടെ അവലോകനം നടത്തി മുഖ്യമന്ത്രി പറഞ്ഞു. കൊച്ചി മെട്രോയുടെ പേട്ടമുതൽ എസ്എൻ ജങ്ഷൻവരെയുള്ള ഭാഗം 2022 മാർച്ചോടെ പൂർത്തിയാക്കും. കലൂർമുതൽ കാക്കനാടുവരെയുള്ള ഭാഗത്തിന് കേന്ദ്രത്തിന്റെ അംഗീകാരം നേടിയെടുക്കും. ഭൂമി ഏറ്റെടുക്കൽ നടപടി ത്വരിതപ്പെടുത്തുകയും പൈതൃക സംരക്ഷണം പരിഗണിച്ച് കൊച്ചി വാട്ടർമെട്രോ പദ്ധതി ഊർജിതമാക്കുകയും ചെയ്യും. ആഗസ്തിൽ നൂറ് ദിന പരിപാടിയുടെ ഭാഗമായി ആദ്യഭാഗം കമീഷൻ ചെയ്യും.

സെമി ഹൈസ്പീഡ് റെയിൽവേയുടെ അവസാന അലൈൻമെന്റ് എത്രയുംവേഗം പൂർത്തീകരിക്കാനും നിർദേശം നൽകി. മലയോര ഹൈവേക്ക് വനംവകുപ്പിന്റെ അനുമതി വേണ്ട സ്ഥലങ്ങൾ ബന്ധപ്പെട്ടവർ സന്ദർശിച്ച് രൂപരേഖ ഉണ്ടാക്കണം. മൂന്നുമാസത്തിനകം ഡിപിആർ പൂർത്തിയാക്കണം. പൂവാർമുതൽ മഞ്ചേശ്വരംവരെയുള്ള തീരദേശപാത രണ്ടു വർഷത്തിനകം പൂർത്തിയാകത്തക്കവിധം പ്രവർത്തനങ്ങൾ മുന്നോട്ട് നീക്കണം. ദേശീയ ജലപാതയുടെ പ്രവർത്തനങ്ങൾ ദ്രുതഗതിയിലാക്കാനും മുഖ്യമന്ത്രി നിർദേശം നൽകി. കൊച്ചി അർബൻ ഡെവലപ്ന്റ് ആൻഡ് വാട്ടർ ട്രാൻസ്പോർട്ടിന്റെ ഭാഗമായി കനാൽ ശുചീകരണത്തിന് വേഗം കൂട്ടണം. തിരുവനന്തപുരം ലൈറ്റ് മെട്രോയുടെ ഭാഗമായുള്ള ഫ്ലൈ ഓവറുകളുടെ നിർമാണം, ലൈറ്റ് മെട്രോയുടെ കേന്ദ്രസർക്കാർ അംഗീകാരം തേടൽ മുതലായ കാര്യങ്ങൾ ത്വരിതപ്പെടുത്തണം. റീബിൽഡ് കേരള പദ്ധതിയുടെ ഭാഗമായ വയനാട് ടണൽ റോഡ് പദ്ധതിക്ക് ആവശ്യമായ ഫണ്ട് കണ്ടെത്തി നടപടി ത്വരിതപ്പെടുത്തുമെന്നും മുഖ്യമന്ത്രി പറഞ്ഞു. യോഗത്തിൽ ചീഫ് സെക്രട്ടറി ഡോ. വി പി ജോയി, വിവിധ വകുപ്പ് സെക്രട്ടറിമാർ, ജില്ലാ കലക്ടർമാർ തുടങ്ങിയവർ പങ്കെടുത്തു.

from Kerala || Deshabhimani ​Online ​News https://ift.tt/3gxdVME
via IFTTT