ഭൂഗര്‍ഭജലാശയത്തിൽ പുതിയൊരു വരാല്‍‌വർഗം; കണ്ടെത്തിയത‌് വേങ്ങരയിലെ നെൽവയലിൽനിന്ന‌്

കൊച്ചി -
ഭൂമിയുടെ ഉപരിതലത്തിന‌് അടിയിലുള്ള ഭൂഗർഭ ശുദ്ധജലാശയങ്ങളിൽ ജീവിക്കുന്ന അപൂർവയിനം വരാൽമത്സ്യത്തെ ലോകത്താദ്യമായി കേരളത്തിൽ കണ്ടെത്തി. കേരള ഫിഷറീസ് സമുദ്ര പഠന സർവകലാശാലയിലെ (കുഫോസ്) ഗവേഷകനായ ഡോ. രാജീവ് രാഘവൻ ഉൾപ്പെട്ട പഠനസംഘമാണ്  സ്‌നേക‌്ഹെഡ‌് (വരാൽ) കുടുംബത്തിൽപ്പെട്ട പുതിയ മത്സ്യ ഇനത്തെ കണ്ടെത്തിയത്. ബ്രിട്ടീഷ് നാച്വറൽ ഹിസ്റ്ററി മ്യൂസിയത്തിലെ ശാസ്ത്രജ്ഞനും പ്രമുഖ ഫിഷ് ടാക്‌സോണമിസ്റ്റുമായ ഡോ. റാൽഫ് ബ്രിറ്റ്‌സ് നയിക്കുന്ന പഠനസംഘത്തിൽ കുഫോസിലെ പിഎച്ച്ഡി വിദ്യാർഥിയായ വി കെ അനൂപും അംഗമാണ്.  പുതിയ വരാൽ മത്സ്യ ഇനത്തെ കണ്ടെത്തിയ വിവരം ന്യൂസിലൻഡിൽനിന്നിറങ്ങുന്ന ഇന്റർനാഷണൽ അനിമൽ ടാക്‌സോണമി ജേർണലായ സൂടാക്‌സയുടെ പുതിയ ലക്കത്തിൽ ഉൾപ്പെടുത്തിയിട്ടുണ്ട്. ഗോലം സ്‌നേക‌്ഹെഡ് എന്നാണ് പുതിയ മത്സ്യ ഇനത്തിന‌് ഇംഗ്ലീഷിൽ പേരിട്ടിരിക്കുന്നത്. ശാസ്ത്രനാമം അനിക്മാചന ഗോലം. ഇതൊരു പുതിയ മത്സ്യ ഇനം മാത്രമല്ല, വരാൽകുടുംബത്തിലെ പുതിയൊരു വർഗംകൂടിയാണെന്ന് ഡോ. റാൽഫ് ബ്രിറ്റ്‌സ് പറയുന്നു.

മലപ്പുറം ജില്ലയിലെ വേങ്ങരയിലുള്ള അജീറിന്റെ നെൽവയലിൽനിന്നാണ് പുതിയ മത്സ്യ ഇനത്തെ കണ്ടെത്തിയത്. കഴിഞ്ഞ ആഗസ‌്തിൽ കേരളത്തിലുണ്ടായ മഹാപ്രളയത്തിന്റെ ശക്തമായ കുത്തൊഴുക്കിൽ സ്വാഭാവിക ആവാസവ്യവസ്ഥയായ ഭൂഗർഭ ജല അറയിൽനിന്ന്  മത്സ്യം പുറത്തെത്തിയതാകാനാണ് സാധ്യതയെന്ന് ഡോ. രാജീവ് രാഘവൻ പറഞ്ഞു. മത്സ്യത്തിന് 9.2 സെന്റി മീറ്റർ നീളമുണ്ട്. 

കേരളത്തിൽ പൊതുവെ കാണുന്ന വരാൽ ഇനങ്ങൾ ഉൾപ്പെടെ സ്‌നേക‌്ഹെഡ് വർഗത്തിൽ ഇതുവരെ 50 ഇനത്തെയാണ് ലോകത്താകമാനം കണ്ടെത്തിയിട്ടുള്ളത്. വടക്കെ അമേരിക്ക, ആഫ്രിക്ക, ഏഷ്യ ഭൂഖണ്ഡങ്ങളിലാണ് ഇവയുടെ സാന്നിധ്യമുള്ളത്. ജലോപരിതലത്തിൽനിന്ന് വായു ശ്വസിക്കുന്ന പ്രകൃതമാണ് ഇവയ‌്ക്ക്. അതുകൊണ്ടുതന്നെ വെള്ളമില്ലാത്ത അവസ്ഥയിൽ കരയിൽ ആഴ്ചകളോളം ജീവിക്കാൻ വരാൽ  മത്സ്യങ്ങൾക്ക് കഴിയും. കുളങ്ങളും വയലുകളിലെ നീർച്ചാലുകളും ഉൾപ്പെടുന്ന ഉപരിതല ജല ആവാസവ്യവസ്ഥയിലാണ് ഇവ ജീവിക്കുന്നത്. എന്നാൽ, ഇതിന് വിപരീതമായി ഇപ്പോൾ കണ്ടെത്തിയ പുതിയ ഇനം വരാൽ ഭൂഗർഭജല അറകളും ഭൂഗർഭ ജലാശയങ്ങളും ആവാസവ്യവസ്ഥയായി സ്വീകരിച്ചിട്ടുള്ള മത്സ്യമാണ്. അതുകൊണ്ട‌് ഇവയ്ക്ക് ജലോപരിതലത്തിൽനിന്ന് ശ്വസിക്കാനുള്ള കഴിവുമില്ല.

ശുദ്ധജലമത്സ്യങ്ങളുടെ വർഗവും ഇനവും തിരിച്ചുള്ള പഠനത്തിൽ നിർണായകമായ വഴിത്തിരിവാണ്   ഭൂഗർഭജല വരാൽ മത്സ്യ ഇനത്തിന്റെ കണ്ടെത്തലെന്ന് കുഫോസ് വൈസ് ചാൻസലർ ഡോ. എ രാമചന്ദ്രൻ പറഞ്ഞു.
 

from Kerala || Deshabhimani ​Online ​News http://bit.ly/2JaFOul
via IFTTT